1.1Anidassanaappaṭighaṁ upekkhāsahagataṁ dhammaṁ paṭicca naanidassanaappaṭigho naupekkhāsahagato dhammo uppajjati hetupaccayā. Anidassanaappaṭighaṁ upekkhāsahagataṁ dhammaṁ paṭicca nasanidassanasappaṭigho naupekkhāsahagato dhammo uppajjati hetupaccayā …pe… anidassanaappaṭighaṁ upekkhāsahagataṁ dhammaṁ paṭicca nasanidassanasappaṭigho naupekkhāsahagato ca naanidassanasappaṭigho naupekkhāsahagato ca dhammā uppajjanti hetupaccayā. (Saṅkhittaṁ.) Hetuyā cha, ārammaṇe tīṇi …pe… avigate cha.

2.1Anidassanaappaṭighaṁ naupekkhāsahagataṁ dhammaṁ paṭicca nasanidassanasappaṭigho nanaupekkhāsahagato dhammo uppajjati hetupaccayā. (Saṅkhittaṁ.) Hetuyā tīṇi …pe… avigate tīṇi.