1.010.3.3.1. Anuloma

1.1Yo cakkhundriyaṁ parijānissati so domanassindriyaṁ pajahissatīti?

2.1Dve puggalā cakkhundriyaṁ parijānissanti, no ca domanassindriyaṁ pajahissanti. Pañca puggalā cakkhundriyañca parijānissanti domanassindriyañca pajahissanti.

3.1Yo vā pana domanassindriyaṁ pajahissati so cakkhundriyaṁ parijānissatīti? Āmantā.

4.1Yo cakkhundriyaṁ parijānissati so anaññātaññassāmītindriyaṁ bhāvessatīti?

5.1Cha puggalā cakkhundriyaṁ parijānissanti, no ca anaññātaññassāmītindriyaṁ bhāvessanti. Ye puthujjanā maggaṁ paṭilabhissanti te cakkhundriyañca parijānissanti anaññātaññassāmītindriyañca bhāvessanti.

6.1Yo vā pana anaññātaññassāmītindriyaṁ bhāvessati so cakkhundriyaṁ parijānissatīti? Āmantā.

7.1Yo cakkhundriyaṁ parijānissati so aññindriyaṁ bhāvessatīti? Āmantā.

8.1Yo vā pana aññindriyaṁ bhāvessati so cakkhundriyaṁ parijānissatīti? Āmantā.

9.1Yo cakkhundriyaṁ parijānissati so aññātāvindriyaṁ sacchikarissatīti? Āmantā.

10.1Yo vā pana aññātāvindriyaṁ sacchikarissati so cakkhundriyaṁ parijānissatīti?

11.1Aggamaggasamaṅgī aññātāvindriyaṁ sacchikarissati, no ca cakkhundriyaṁ parijānissati. Satta puggalā aññātāvindriyañca sacchikarissanti cakkhundriyañca parijānissanti. (Cakkhundriyamūlakaṁ.)

12.1Yo domanassindriyaṁ pajahissati so anaññātaññassāmītindriyaṁ bhāvessatīti?

13.1PTS 2.204Cattāro puggalā domanassindriyaṁ pajahissanti, no ca anaññātaññassāmītindriyaṁ bhāvessanti. Ye puthujjanā maggaṁ paṭilabhissanti te domanassindriyañca pajahissanti anaññātaññassāmītindriyañca bhāvessanti.

14.1Yo vā pana anaññātaññassāmītindriyaṁ bhāvessati so domanassindriyaṁ pajahissatīti? Āmantā.

15.1Yo domanassindriyaṁ pajahissati so aññindriyaṁ bhāvessatīti? Āmantā.

16.1Yo vā pana aññindriyaṁ bhāvessati so domanassindriyaṁ pajahissatīti?

17.1Dve puggalā aññindriyaṁ bhāvessanti no ca domanassindriyaṁ pajahissanti, pañca puggalā aññindriyañca bhavissanti domanassindriyañca pajahissanti.

18.1Yo domanassindriyaṁ pajahissati so aññātāvindriyaṁ sacchikarissatīti? Āmantā.

19.1Yo vā pana aññātāvindriyaṁ sacchikarissati so domanassindriyaṁ pajahissatīti?

20.1Tayo puggalā aññātāvindriyaṁ sacchikarissanti, no ca domanassindriyaṁ pajahissanti. Pañca puggalā aññātāvindriyañca sacchikarissanti domanassindriyañca pajahissanti. (Domanassindriyamūlakaṁ.)

21.1Yo anaññātaññassāmītindriyaṁ bhāvessati so aññindriyaṁ bhāvessatīti? Āmantā.

22.1Yo vā pana aññindriyaṁ bhāvessati so anaññātaññassāmītindriyaṁ bhāvessatīti?

23.1Cha puggalā aññindriyaṁ bhāvessanti, no ca anaññātaññassāmītindriyaṁ bhāvessanti. Ye puthujjanā maggaṁ paṭilabhissanti te aññindriyañca bhāvessanti anaññātaññassāmītindriyañca bhāvessanti.

24.1Yo anaññātaññassāmītindriyaṁ bhāvessati so aññātāvindriyaṁ sacchikarissatīti? Āmantā.

25.1Yo vā pana aññātāvindriyaṁ sacchikarissati so anaññātaññassāmītindriyaṁ bhāvessatīti?

26.1Satta puggalā aññātāvindriyaṁ sacchikarissanti, no ca anaññātaññassāmītindriyaṁ bhāvessanti. Ye puthujjanā maggaṁ paṭilabhissanti te aññātāvindriyañca sacchikarissanti anaññātaññassāmītindriyañca bhāvessanti. (Anaññātaññassāmītindriyamūlakaṁ.)

27.1Yo aññindriyaṁ bhāvessati so aññātāvindriyaṁ sacchikarissatīti? Āmantā.

28.1Yo vā pana aññātāvindriyaṁ sacchikarissati so aññindriyaṁ bhāvessatīti?

29.1Aggamaggasamaṅgī aññātāvindriyaṁ sacchikarissati, no ca aññindriyaṁ bhāvessati. Satta puggalā aññātāvindriyañca sacchikarissanti aññindriyañca bhāvessanti. (Aññindriyamūlakaṁ.)

30.010.3.3.2. Paccanīka

30.1Yo cakkhundriyaṁ na parijānissati so domanassindriyaṁ nappajahissatīti? Āmantā.

31.1Yo vā pana domanassindriyaṁ nappajahissati so cakkhundriyaṁ na parijānissatīti?

32.1Dve puggalā domanassindriyaṁ nappajahissanti, no ca cakkhundriyaṁ na parijānissanti. Tayo puggalā domanassindriyañca nappajahissanti cakkhundriyañca na parijānissanti.

33.1Yo cakkhundriyaṁ na parijānissati so anaññātaññassāmītindriyaṁ na bhāvessatīti? Āmantā.

34.1Yo vā pana anaññātaññassāmītindriyaṁ na bhāvessati so cakkhundriyaṁ na parijānissatīti.

35.1PTS 2.205Cha puggalā anaññātaññassāmītindriyaṁ na bhāvessanti, no ca cakkhundriyaṁ na parijānissanti. Tayo puggalā anaññātaññassāmītindriyañca na bhāvessanti cakkhundriyañca na parijānissanti.

36.1Yo cakkhundriyaṁ na parijānissati so aññindriyaṁ na bhāvessatīti? Āmantā.

37.1Yo vā pana aññindriyaṁ na bhāvessati so cakkhundriyaṁ na parijānissatīti? Āmantā.

38.1Yo cakkhundriyaṁ na parijānissati so aññātāvindriyaṁ na sacchikarissatīti?

39.1Aggamaggasamaṅgī cakkhundriyaṁ na parijānissati, no ca aññātāvindriyaṁ na sacchikarissati. Dve puggalā cakkhundriyañca na parijānissanti aññātāvindriyañca na sacchikarissanti.

40.1Yo vā pana aññātāvindriyaṁ na sacchikarissati so cakkhundriyaṁ na parijānissatīti? Āmantā. (Cakkhundriyamūlakaṁ.)

41.1Yo domanassindriyaṁ nappajahissati so anaññātaññassāmītindriyaṁ na bhāvessatīti? Āmantā.

42.1Yo vā pana anaññātaññassāmītindriyaṁ na bhāvessati so domanassindriyaṁ nappajahissatīti?

43.1Cattāro puggalā anaññātaññassāmītindriyaṁ na bhāvessanti, no ca domanassindriyaṁ nappajahissanti. Pañca puggalā anaññātaññassāmītindriyañca na bhāvessanti domanassindriyañca nappajahissanti.

44.1Yo domanassindriyaṁ nappajahissati so aññindriyaṁ na bhāvessatīti?

45.1Dve puggalā domanassindriyaṁ nappajahissanti, no ca aññindriyaṁ na bhāvessanti. Tayo puggalā domanassindriyañca nappajahissanti aññindriyañca na bhāvessanti.

46.1Yo vā pana aññindriyaṁ na bhāvessati so domanassindriyaṁ nappajahissatīti? Āmantā.

47.1Yo domanassindriyaṁ nappajahissati so aññātāvindriyaṁ na sacchikarissatīti?

48.1Tayo puggalā domanassindriyaṁ nappajahissanti, no ca aññātāvindriyaṁ na sacchikarissanti. Dve puggalā domanassindriyañca nappajahissanti aññātāvindriyañca na sacchikarissanti.

49.1Yo vā pana aññātāvindriyaṁ na sacchikarissati so domanassindriyaṁ nappajahissatīti? Āmantā. (Domanassindriyamūlakaṁ.)

50.1Yo anaññātaññassāmītindriyaṁ na bhāvessati so aññindriyaṁ na bhāvessatīti?

51.1Cha puggalā anaññātaññassāmītindriyaṁ na bhāvessanti, no ca aññindriyaṁ na bhāvessanti. Tayo puggalā anaññātaññassāmītindriyañca na bhāvessanti aññindriyañca na bhāvessanti.

52.1Yo vā pana aññindriyaṁ na bhāvessati so anaññātaññassāmītindriyaṁ na bhāvessatīti? Āmantā.

53.1Yo anaññātaññassāmītindriyaṁ na bhāvessati so aññātāvindriyaṁ na sacchikarissatīti?

54.1Satta puggalā anaññātaññassāmītindriyaṁ na bhāvessanti, no ca aññātāvindriyaṁ na sacchikarissanti. Dve puggalā anaññātaññassāmītindriyañca na bhāvessanti aññātāvindriyañca na sacchikarissanti.

55.1Yo vā pana aññātāvindriyaṁ na sacchikarissati so anaññātaññassāmītindriyaṁ na bhāvessatīti? Āmantā. (Anaññātaññassāmītindriyamūlakaṁ.)

56.1Yo aññindriyaṁ na bhāvessati so aññātāvindriyaṁ na sacchikarissatīti?

57.1Aggamaggasamaṅgī aññindriyaṁ na bhāvessati, no ca aññātāvindriyaṁ na sacchikarissati. Dve puggalā aññindriyañca na bhāvessanti aññātāvindriyañca na sacchikarissanti.

58.1Yo vā pana aññātāvindriyaṁ na sacchikarissati so aññindriyaṁ na bhāvessatīti? Āmantā. (Aññindriyamūlakaṁ.)